Бишкек, 10.04.26. /Кабар/. Жер титирөөгө туруктуу курулуш жана инженердик долбоорлоо мамлекеттик институту тарабынан Ош шаарында курулуп жаткан мейманкананын имаратына инженердик текшерүү жүргүзүлдү. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, иштин алкагында объекттин сейсмикалык коопсуздугу дыкат текшерилди. Адистер объекттин долбоордук жана техникалык документтерин карап чыгып, тиешелүү чиймелерди түзүштү. Ошондой эле имараттын конструкцияларына инженердик жактан комплекстүү анализ жүргүзүлдү.
"Учурда институт тарабынан курулуш конструкцияларынын техникалык абалы боюнча корутунду даярдалууда. Анын жыйынтыгы менен имаратты мындан ары пайдалануу боюнча тиешелүү сунуштар иштелип чыгат",-деп айтылат маалыматта.
