Бишкек, 22.10.25. /Кабар/. Ош шаарында турак үйдөн чыккан өрт толук өчүрүлдү. Бул тууралуу Өзгөчө кырдаалдар министрлиген кабарлашты.
Маалыматка ылайык, бүгүн болжол менен саат 03:30да Орозбеков көчөсүндөгү турак үйлөрдүн биринин жер төлөсүнөн өрт чыккан.
Тилсиз жоо боюнча билдирүү ӨКМге саат 05:56да түшүп, 06:04тө Ош шаарынын өрт өчүрүү бөлүмү окуя болгон жерге жеткен. Саат 06:25те өрт чектөөгө алынып, 09:46да толук өчүрүлгөн. Өрттүн кесепетинен 34 жаштагы аял жана анын 5 баласы каза болгону аныкталды.
Өрттүн аянты болжол менен 280 чарчы метрди түзөт. Алдын ала маалыматта белгилегендей, үйдө электр жылытуучу жабдуу колдонулган. Кырсыктын себеби такталууда.
