Бишкек, 07.04.25. /Кабар/. Бүгүн Ош шаарында Дене тарбия жана спорт кызматкерлеринин күнүнө карата салтанаттуу иш-чара өттү. Бул тууралуу муниципалитеттен билдиришти.
Иш-чарага Ош шаардык кеңешинин төрагасы Болот Баетов, Ош шаарынын мэринин орун басары Салтанат Аманова, мэриянын дене тарбия жана спорт комитетинин төрагасы Бекдөөлөт Абакиров катышып, спортчуларга жаңы ийгиликтерди каалашты.
Майрамдык иш-чаранын алкагында өткөн жылы эл аралык мелдештерде бир топ ийгиликтерге жетишкен 53 спортчу, анын ичинен 29 машыктыруучу жана спорттун ардагерлери, Ош шаарында спортту өнүктүрүүгө кошкон салымы үчүн атайын төш белги, Ош шаарынын мэриясынын Ардак грамоталары жана акчалай сыйлыктары менен сыйланышты.
Ошондой эле спортчулар, "Шер" атайын багыттагы аскер бөлүгүнүн жоокерлери өз чеберчиликтерин көрсөтүшүп, маданият кызматкерлеринин катышуусунда концерттик программа тартууланды.
