Бишкек, 16.10.26. /Кабар/. Бишкек шаарындагы Айтматов проспектисине отургузулган клён бактары өсүп, аймакка көрк бере баштады. Бул тууралуу президенттин администрациясынын маалыматтык саясат кызматынын жетекчиси Дайырбек Орунбеков социалдык тармактагы баракчасына жазды.
Анын айтымында, буга чейин аталган проспектиде 50 жылдан ашык убакыт мурда тигилген теректер өсүп турган.
“Алардын айрымдары куурай баштагандыктан жана жолду кеңейтүү зарылчылыгы жаралгандыктан бактарды кыюуга туура келген. Албетте, шаарга көрк берип турган теректер кыйылганда коомчулук тарабынан сын-пикирлер айтылып, өкүнүч жаралган. Бирок алардын орду бош калган жок — көп жылдык кызыл клён бактары отургузулду. Мына эми ошол көчөттөр кадимкидей бой жетип, көркүнө чыгып келе жатат”, — деп белгиледи Дайырбек Орунбеков.
Ал кошумчалагандай, клён бактарынын айрым түрлөрү 150-200 жылдан 300 жылга чейин жашайт.
“Демек, бүгүн биз тигип, өстүрүп жаткан бактар кийинки муундарга көлөкө болуп, шаарыбызга кылымдар бою көрк берип турат”, — деди ал.
