Бишкек, 21.03.26 /Кабар/. Казакстандын президенти Касым-Жомарт Токаев Кыргызстандын президенти Садыр Жапаровду жана Кыргызстан элин Нооруз майрамы менен куттуктады.
"Жаңылануунун башаты, бакубаттуулуктун жана молчулуктун булагы болгон бул жаркын майрам бүткүл адамзатты жакшы дөөлөттөргө үндөйт. Нооруз – чоң үмүт менен тосулган өзгөчө майрам. Жаңылануунун жаз майрамы боордош элдерге жарык, кут-береке жана кубаныч алып келсин. Биргелешкен аракеттерибиздин аркасында өз ара түшүнүшүүгө негизделген бекем достук жана ынак коңшулук мамиле, ошондой эле Казакстан менен Кыргызстандын ортосундагы стратегиялык өнөктөштүк мындан ары дагы биздин элдерибиздин жыргалчылыгы үчүн динамикалуу өнүгөт деп ишенем", - деп айтылат куттуктоо телеграммасында.
Касым-Жомарт Токаев ошондой эле Садыр Жапаровго Кыргызстандын жаркын келечеги жана гүлдөп-өсүшү үчүн багытталган ишмердүүлүгүнө ийгиликтерди, ал эми боордош кыргыз элине бакубатчылык жана молчулук каалады.
Тажикстандын президенти Эмомали Рахмон Кыргызстандын президенти Садыр Жапаровду жана Кыргызстан элин Нооруз майрамы менен куттуктады.
“Нооруз цивилизациясынын аймагындагы элдер бул терең улуттук-маданий жана тарыхый тамырлары бар, берекелүү майрамды зор кубаныч жана шыктануу, жаркын келечекке болгон жаңы үмүттөр менен белгилешет. Анын бийик баалуулуктары жана бай идеалдары миңдеген жылдар бою биздин элдерди тынчтыкка жана ынтымакка, өз ара түшүнүшүүгө, бирин бири урматтоого жана ишенимге чакырып келет. Тажик-кыргыз достук, коңшулаштык жана өз ара пайдалуу кызматташтык мамилелери бул байыркы майрамдын эң мыкты каада-салттарынын рухунда мындан ары да өнүгүп, чыңдалып, элибиздин жыргалчылыгы үчүн жаңы практикалык мазмун менен байытылат деп ишенем. Ушул кубанычтуу майрам күндөрүндө сизге чың ден соолук жана жогорку мамлекеттик ишиңизге ийгиликтерди, ал эми өлкөңүздүн достук мамиледеги элине бакыт, бакубатчылык, тынчтык, туруктуулук, мындан аркы прогресс жана гүлдөп-өнүгүүнү каалайм”, - деп айтылат телеграммада.
Түркмөнстандын президенти Сердар Бердымухамедов Кыргызстандын президенти Садыр Жапаровду жана Кыргызстан элин Нооруз майрамы менен куттуктады.
“Тынчтыкты, ынак коңшулаштыкты, тилектештикти жана табият менен гармонияда жашоону чагылдырган Нооруз майрамы жаңы күндүн, жаңы башталыштын жарчысы. Бул жалпы адамзаттын бай маданий мурасынын ажырагыс бөлүгү катары таанылган, бийик гуманисттик идеалдарды камтыган жаркын майрам элдердин ортосундагы достукту жана биримдикти бекемдөөдө өзгөчө мааниге ээ. Бул сонун майрам сиз жана сиздин өлкөнүн эли үчүн бакыт, кубаныч жана жаңы ийгиликтер менен коштолсун!”, - деп айтылат куттуктоо телеграммасында.
