Бишкек, 08.09.26. /Кабар/. Нидерланддын PAL-V компаниясы чыгарган учуучу унаа өндүрүшкө чыгарылууга жакындады. Бул тууралуу АЗЕРТАЖ жазды.
Компания Европанын авиациялык коопсуздук агенттигинен (EASA) өндүрүш сертификатын алды.
Бул уруксат PAL-V Liberty деп аталган унаанын аэрокосмостук компоненттерин чыгарууну баштоого мүмкүндүк берет. Компания учуучу аппараттын өзүнө сертификатты болжол менен бир жарым жылдан кийин алууну күтүп жатат. Эгер бардык сыноолор ийгиликтүү өтсө, унаа 2028-жылы учууга уруксат алышы мүмкүн.
PAL-V Liberty үч дөңгөлөктүү унаага окшош болуп, жыйналма ротор жана винт менен жабдылган. Жолдо кадимки автоунаа сыяктуу башкарылат, ал эми абага көтөрүлүү үчүн ротору ачылат. Бирок тик учак сыяктуу тикесинен көтөрүлө албайт — учуу үчүн учуп-конуу тилкеси талап кылынат.
Компаниянын маалыматына караганда, унаанын жолдогу максималдуу ылдамдыгы саатына 160 чакырымды, ал эми абада уча ала турган аралыгы 400–500 чакырымды түзөт. Аны башкаруу үчүн айдоочулук күбөлүктөн тышкары пилоттук лицензия талап кылынат.
PAL-V буга чейин мындай унаалардын 250 даанасына заказ алган, алардын арасында Нидерланддын өрт өчүрүү кызматтары да бар. Баасы салыктарды жана башка чыгымдарды эсепке албаганда 299 миң евродон башталат.
Компания учуучу унааны иштеп чыгуунун үстүндө 20 жылдан ашык убакыттан бери иштеп келет.
