Бишкек, 13.10.26. /Кабар/. Саламаттык сактоо министри Дамир Осмонов баштаган делегация Москвадагы Россия хирургдарынын XVII съездинде заманбап роботтоштурулган хирургиялык жабдуулар менен таанышты.
Ведомствонун маалыматына ылайык, делегация жогорку технологиялуу, аз инвазивдүү операцияларды жүргүзүүгө арналган россиялык роботтоштурулган эндоскопиялык комплексти көрдү.
Мындай системалар хирургиялык аспаптарды так башкарууга, кичинекей кесүүлөр аркылуу операция жасоого жана операциялык аймактын чоңойтулган сүрөтүн көрүүгө мүмкүндүк берет. Ошол эле учурда негизги аракеттер жана клиникалык чечимдер дарыгердин көзөмөлүндө калат.
Съездде "Аугментех" компаниясы иштеп чыккан роботтоштурулган эндоскопиялык комплекс да көрсөтүлдү. Маалыматка караганда, жабдуу тиешелүү сыноолордон өтүп, каттоо күбөлүгүн алган.
Белгилей кетсек, Россия хирургдарынын XVII съезди 12-14-октябрда Москвада өтүүдө. Анын алкагында хирургиядагы заманбап дарылоо ыкмалары, инновациялык медициналык технологиялар жана роботтоштурулган операцияларды өнүктүрүү маселелери талкууланууда.
