Бишкек, 19.09.25 /Кабар/. "Ынтымак Ордодо" Экология, климаттын өзгөрүшү жана "жашыл" экономиканы өнүктүрүү маселелери боюнча координациялык кеңештин биринчи жыйыны өттү. Жыйынга министрлер кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Бакыт Төрөбаев жетекчилик кылды.
Белгилей кетсек, бул координациялык кеңеш – мамлекеттик органдардын, жергиликтүү өз алдынча башкаруу органдарынын, уюмдардын жана мекемелердин экология, климаттын өзгөрүшү жана “жашыл” экономиканы өнүктүрүү чөйрөсүндөгү ишин координациялоо системасынын натыйжалуулугун жогорулатуу максатында түзүлгөн.
Отурумда Жаратылыш ресурстары, экология жана техникалык көзөмөл министрлигинин координациясынын алкагында жүргүзүлгөн азыркы климаттык өзгөрүүлөргө байланышкан баяндамасы угулду.
Тагыраагы өндүрүш жана башка объекттерден абага буу менен (парник газы) бөлүнүп чыккан газды азайтуу, аны сиңирүү жана климаттын өзгөрүшүнүн кесепеттерине адаптация боюнча максаттарды аныктаган баяндама каралып, координациялык кеңештин мүчөлөрү тарабынан жактырылды. Ал документ – Улуттук деңгээлде аныкталган салым жана биринчи Эки жылдык ачыктык (транспаренттүүлүк) боюнча отчет.
Министрлер кабинети климаттык саясатты 2030-жылга чейин Кыргызстанды өнүктүрүүнүн улуттук программасында да камтыган. Улуттук деңгээлде аныкталган салымынын жетишкендиктери жакынкы арада өтө турган БУУнун Башкы ассамблеясынын 80-жылдык мааракелик сессиясында белгиленет.
