Бишкек, 23.04.26. /Кабар/. Ош шаарындагы Ишкаван айылына үч кабаттуу мектеп курулууда. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, долбоор республикалык бюджеттен каржыланууда. Мектеп заманбап үлгүдө курулуп, мүмкүнчүлүгү чектелген балдар үчүн да атайын шарттар каралат.
Анда 700 окуучуга ылайыкталган окуу класстары, лаборатория, ашкана, китепкана, 300 көрүүчүгө ылайыкталган амфитеатр тибиндеги жыйындар залы, лифт, мүмкүнчүлүгү чектелген балдар үчүн атайын даараткана жана 120 көрүүчүгө ылайыкталган спорт залы болот.
Учурда имараттын пайдубалын куюу иштери аяктап, жеринде 90 жумушчу иштеп жатат.
Белгиленгендей, эски мектеп 1990-жылдары кичи ишкана багытында курулуп, кийин мектеп катары пайдаланылып келген.
