Бишкек, 03.04.25. /Кабар/. Лейлекте мектеп окуучуларына баңгизаттын зыяндуулугу боюнча түшүндүрүү иштери жүргүзүлүүдө. Бул тууралуу Баткен облустук ички иштер башкармалыгынан билдиришти.
Лейлек райондук милиция кызматкерлери Лейлек айыл аймагындагы мектептерде синтетикалык наркотиктердин зыяндуулугун жана алардын жашы жете элек окуучулар арасында колдонулушун алдын алуу максатында түшүндүрүү иштерин өткөрүштү.
Иш-чара Лейлек айыл аймагындагы билим берүү мекемелериндеги 7-8-9-10-11-класстардын окуучуларына багытталып, синтетикалык наркотиктердин терс таасирлери жана алардын ден соолукка, психологияга жана коомго тийгизген зыяндары жөнүндө лекциялар окулду.
Мындан тышкары, видеороликтер көрсөтүлүп, окуучуларга наркотиктердин коркунучтары жана анын мыйзамсыз колдонулушунун кесепеттерин түшүндүрүүгө басым жасалды.
Иш-чаранын максаты — мектеп окуучуларына синтетикалык наркотиктердин зыяндуулугун, аларды колдонууга болбой тургандыгын жана анын жашоо образына тийгизген терс таасирин түшүндүрүү.
Милиция кызматкерлери окуучуларга наркотиктерден баш тартып, туура жашоо стилин карманып, алардын келечегин коргоону улантууну сунушташты.
