Бишкек, 17.02.25. /Кабар/. Кыргызстандык окуучулар Румынияда өткөн IX Info (1) Cup эл аралык олимпиадада 7 медаль жеңип алышты. Бул тууралуу Билим берүү жана илим министрлигинен билдиришти.
2025-жылдын 7-9-февралда өтүп, ага дүйнөнүн Армения, Азербайжан, Болгария, Египет, Грузия, Венгрия, Израил, Италия, Казакстан, Кыргызстан, Румыния, Сербия, Сирия, Түркмөнстан, Украина, Англия, Өзбекстан сыяктуу күчтүү өлкөлөрүнөн 2009-жылы, же андан кийин төрөлгөн 184 окуучу катышты.
Кыргызстандын командасынын курамына 8 окуучу кирди. Жыйынтыгында эл аралык олимпиадага Кыргызстандын атынан катышкан 7 окуучу байгелүү орундарды ээлеп (1 алтын медаль, 3 күмүш медаль, 3 коло медаль утуп), 1 катышуучу сертификатты жеңип алды.
Алтын медалды Ош шаарындагы Сапат лицейинин, 9-классынын окуучуcу Абдуллахан Абдирасулов тагынды. Аны бул олимпиадага Кылычбек Урайымов даярдаган.
Күмүш медалдарды Нарын шаарындагы Сапат лицейинин 9-классынын окуучусу Адилхан Кадыров, Токмок шаарындагы Сапат лицейинин 10-классынын окуучусу Нурислам Карыпжанов, Бишкек шаарындагы Е.Б. Якир атындагы № 61 автордук физика-математикалык лектеп-лицейинин 9-классынын окуучусу Сабыр Алымбековдор жеңип алышты. Адилхан менен Нурисламды олимпиадага Кылычбек Урайымов даярдаган, ал эми Сабырды олимпиадага Медербек Осмонов даярдаган.
Коло медалга “Сейтек-Стем” мектебинин 9-классынын окуучусу Рамазан Мананов, Ош шаарындагы Сапат лицейинин 9-классынын окуучуcу Али Арапов, профессор А. Молдокулов атындагы Улуттук инновациялык технологиялар мектеп-лицейинин 9-классынын окуучуcу Саид Жаникеевдер татыктуу болушту. Рамазан менен Алини олимпиадага Кылычбек Урайымов даярдаган, ал эми Саидди олимпиада агайы Бексултан Алмазбеков даярдаган.
Андан тышкары Кылычбек Урайымов даярдаган Кызыл-Кыя шаарындагы Сапат лицейинин 9-классынын окуучусу Азирети-Билал Жаныбаев сертификатка ээ болду.
