Бишкек, 03.03.25. /Кабар/. Кыргызстандын спорттук күрөш (эркин, грек-рим жана кыз-келиндер күрөшү) боюнча улуттук курама командасы Албанияда өткөн рейтингди мелдеште 9 медал жеңишти.
Дене тарбия жана спорт мамлекеттик агенттигинен билдиришкендей, анын ичинен 2 алтын, 3 күмүш жана 4 коло медаль.
Мелдеш 26-февралда башталып 2-март күнү жыйынтыкталды.
Ошентип, грек-рим күрөшү боюнча Ырыскелди Максатбек уулу (77 кг) жана Раззак Бейшекеев (67 кг) рейтингдик мелдештин жеңүүчүсү аталды. 63 кг чейинки салмакта Дөөлөтбек Чойбеков күмүш медалга ээ болду. Баяман Каримов (67 кг) жана Ырыскелди Хамзаев (72 кг) 3-орунга ээ болушту.
Курама команда башкы машыктыруучу Уран Жузуп уулу жана улук машыктыруучу Атай Замирбековдун жетекчилиги алдында мелдешке катышты.
Ал эми эркин күрөш боюнча 65 кг чейинки салмакта Тайырбек Жумашбек уулу күмүш медаль жана Билол Шарип уулу коло медалга ээ болду. 57 кг чейинки салмакта Алмаз Сманбеков 3-орунду ээледи.
Курам башкы машыктыруучу Азат Мирахимов жана улук машыктыруучулар Ильгиз Джакыпбеков, Эламан Догдурбек уулунун жетекчилиги алдында мелдешке катышты.
Ошондой эле кыз-келиндер арасында 76 кг чейинки салмак категориясында Айпери Медет кызы күмүш медалга ээ болду
Белгилей кетсек, улуттук курама команда башкы машыктыруучу Нурбек Изабеков жана улук машыктыруучу Нурдан Донбаевдин жетекчилиги алдында мелдешке катышты.
