Бишкек, 29.07.26. /Кабар/. Кыргызстанда жер семирткич өндүрүүчү завод куруу боюнча ведомстволук аралык жумушчу топтун төрагасы, суу ресурстары, айыл чарба жана кайра иштетүү өнөр жайы министринин биринчи орун басары Илич Марсбек уулу баштаган делегация Кытайда иш сапары менен болду.
Ведомствонун маалыматына ылайык, Пекин шаарында мамлекеттик органдардын жана жеке компаниялардын өкүлдөрү менен сүйлөшүүлөр өткөрүлүп, Кыргызстанда жер семирткич өндүрүшүн өнүктүрүү боюнча кызматташуу маселелери талкууланды.
Ошондой эле делегация Кытайдын Ички Монголия автономдуу районунда көмүрдөн жер семирткич өндүргөн ири ишкананын ишмердүүлүгү менен таанышты.
Мындан тышкары, Кыргызстанда учурда курулуп жаткан жер семирткич өндүрүүчү заводдо эмгектене турган адистерди Кытайда окутуу жана өндүрүштүк тажрыйбадан өткөрүү боюнча кызматташтык тууралуу макулдашууларга кол коюлду.
Бул демилге келечектеги ишкананы квалификациялуу кадрлар менен камсыз кылууга жана заманбап өндүрүштүк көндүмдөрдү өздөштүрүүгө өбөлгө түзөт.
