Бишкек, 02.10.26. /Кабар/. Кыргызстанда аба ырайы кескин өзгөрүп, температура төмөндөйт.
Өзгөчө кырдаалдар министрлиги билдиргендей, 4-октябрда күндүн экинчи жарымында жана 5-октябрда өлкө аймагында аба ырайынын кескин өзгөрүшү күтүлөт. Мезгил-мезгили менен жаан жаап, тоолуу райондордо жаан карга айланат, ал эми бийик тоолордо кар жаашы мүмкүн. Айрым аймактарда жаан-чачын катуу жаайт. Батыштан соккон шамалдын ылдамдыгы секундасына 4–9 метрден, айрым жерлерде 15–20 метрге, ал эми Ысык-Көл акваториясынын батыш тарабында 19–24 метрге чейин күчөшү күтүлөт.
5-октябрда күндүз жана 6-октябрда абанын температурасы кескин төмөндөйт:
- Чүй өрөөнүндө: түнкүсүн +3…+8°, күндүз +9…+14°;
- Талас өрөөнүндө: түнкүсүн +1…+6°, күндүз +9…+14°;
- Ош, Жалал-Абад, Баткен өрөөндөрүндө: түнкүсүн +5…+10°, күндүз +16…+21°;
- Ысык-Көл жана Нарын облустарынын дыйканчылык аймактарында: түнкүсүн +1…+6°, күндүз +11…+16°;
- Тоолуу райондордо: түнкүсүн 0…-5° суук, күндүз +1…+6° жылуу;
- Бийик тоолуу райондордо: түнкүсүн -5…-10° суук, күндүз -1° сууктан +4° жылуулукка чейин болот.
Мындай туруксуз аба ырайы унаа каттамын, энергетика жана коммуналдык кызматтардын ишин кыйындатып, жайыттарда мал багууну татаалдаштырат.
