Бишкек, 29.01.26. /Кабар/. Күн мурун курулуш, архитектура жана турак жай-коммуналдык чарба министри Нурдан Орунтаев Түркиянын Кыргызстандагы элчиси Мекин Мустафа Кемаль Өкем менен жолукту.
Ведомстводон билдиришкендей, жолугушууда Кыргызстан менен Түркиянын ортосундагы көп кылымдык достук мамилелер белгиленип, курулуш тармагында тажрыйба алмашуу жана биргелешкен долбоорлорду ишке ашыруу маселелери талкууланды.
Министр Нурдан Орунтаев кыргыз тарап турак жай жана инфраструктуралык курулушту өнүктүрүүгө, ошондой эле жогорку сейсмикалык активдүүлүктү эске алуу менен объектилерди сейсмикалык жактан туруктуу долбоорлоо жана куруу багытында кызматташтыкты кеңейтүүгө кызыкдар экенин белгиледи.
Өз кезегинде Түркиянын элчиси түрк тарап эки тараптуу кызматташууну чыңдоого, ошондой эле тиешелүү мамлекеттик органдар менен ишкер чөйрөлөрдүн ортосундагы практикалык өз ара аракеттенүүнү өнүктүрүүгө даяр экенин билдирди.
