Бишкек, 04.03.25. /Кабар/. Транспорт жана коммуникациялар министри Абсаттар Сыргабаев казакстандык кесиптеши Марат Карабаев менен онлайн кеңешме өткөрдү.
Ведомстводон билдиришкендей, жыйында кыргыз-казак чек арасында жайгашкан өткөрмө бекеттердеги көпүрөлөрдү реконструкциялоо талкууланды.
Мындан тышкары, "Камышановка – Ак-Суу" өткөрмө бекетинин ишин жандандыруу маселеси каралып жатканы кошумчаланды.
Биргелешкен жыйында жүргүзүлүп жаткан иш-чаралар Кыргызстан менен Казакстандын транспорттук инфраструктура жаатындагы кызматташтыгын чыңдоого, соода-экономикалык байланыштарды өнүктүрүүгө жана коңшулук мамилелерди бекемдөөгө чоң салым кошот деп белгиленди.
Онлайн кеңешмеге министрлердин орун басарлары, эки өлкөнүн чек ара кызматынын жетекчилери катышты.
