Бишкек, 22.08.25. /Кабар/. Казакстандын президенти Касым-Жомарт Токаев бүгүн, 22-августта Кыргызстандын президенти Садыр Жапаровдун катышуусунда Кыргызстандын мамлекеттик жана коомдук ишмерлерин "Достык" ордени менен сыйлады.
Казакстан менен Кыргызстандын ортосундагы достук жана союздаштык мамилелерди өнүктүрүүгө кошкон зор салымы үчүн I даражадагы "Достык" ордени менен:
- Министрлер кабинетинин төрагасынын орун басары - Улуттук коопсуздук мамлекеттик комитетинин Төрагасы Камчыбек Ташиев сыйланды.
II даражадагы "Достык" ордени менен:
- Жогорку Кеңештин депутаты Дастанбек Жумабеков;
- Президенттин кеңешчиси Арслан Койчиев;
- Коомдук ишмер Аскар Салымбеков сыйланды.
Казакстандын Президенти Касым-Жомарт Токаев бул жөн гана салтанат эмес, Казакстандын боордош Кыргызстан элине болгон ыраазычылыгынын жана терең урматтоосунун белгиси экенин өзгөчө белгиледи.
"Бүгүнкү окуя казак-кыргыз мамилелеринин тарыхында элдерибиздин түбөлүк боордоштугунун жана коңшулаштыгынын символу катары алтын тамгалар менен жазылып калат деген ишеничтемин. Сиздер өз Мекениңиздердин ырааттуу өнүгүүсүнө гана эмес, Казакстан менен Кыргызстандын ортосундагы көп кырдуу кызматташтыкты чыңдоого да олуттуу салым кошо бересиздер деп ынанып турам", - деп белгиледи Касым-Жомарт Токаев.
