Бишкек, 27.03.25. /Кабар 25-26-март күндөрү Жалал-Абад жана Ош облустарында 600дөн ашуун ишкерлерге Эмгек кодексинин жаңы ченемдери тууралуу маалымат берилди. Бул тууралуу Эмгек, социалдык камсыздоо жана миграция министрлигинен билдиришти.
Жолугушуулар "Бизнести агартуу кербени" маалыматтык кампаниясынын алкагында ЖИА Бизнес Ассоциациясы жана министрлер кабинетине караштуу Инвестициялык кеңеш менен биргеликте уюштурулду.
Кампаниянын максаты быйыл жаңыдан күчүнө кирген КР Эмгек кодексинин кабыл алынышына байланыштуу эмгек мыйзамдарындагы өзгөртүүлөрдү түшүндүрүү болду.
Иш-чараларга өлкөнүн түштүк региондорунда иштеген 600гө жакын ишкерлер, чакан жана орто ишканалардын ээлери катышты.
Семинардын катышуучуларына жаңы Эмгек кодексинин негизги жоболору, анын ичинде эмгек келишимдерин түзүүнүн жаңы эрежелери, жумуш берүүчүлөрдүн майыптыгы бар адамдар жана балдар үйлөрүнүн бүтүрүүчүлөрү үчүн жумуш орундарын квоталоо боюнча милдеттенмелери кеңири түшүндүрүлдү. Ошондой эле эмгекти коргоо шарттарын жакшыртууга жана эмгектин ийкемдүү формаларында жумушчулардын укуктарына көңүл бурулду.
Эмгек министрлиги "Бизнести агартуу кербени" маалыматтык кампаниясынын алкагында аймактардагы ишкерлерди эмгек мыйзамдарына киргизилген нормалар боюнча маалыматтык колдоо жана окутуу боюнча ишин улантат.
