Бишкек, 04.03.25. /Кабар/. Бүгүн эмгек, социалдык камсыздоо жана миграция министри Равшаг Сабиров Улуу Британиянын айыл чарба тармагындагы сезондук жумушка талапкерлерди тандоо иш-чарасына катышты.
Ведомствонун маалыматына караганда, иш-чара Эмгек министрлигине караштуу Жарандарды чет өлкөдө ишке орноштуруу борбору жана Улуу Британия өкмөтү ыйгарым укук берген HOPS Labor Solutions Ltd жана Pro-Force операторлору тарабынан уюштурулган.
Борбордун расмий migrant.kg сайты аркылуу онлайн каттоодон өткөн жарандар бир нече тандоо баскычынан өтүүдө. Алардын арасында тестирлөө, маектешүү жана физикалык жөндөмүн текшерүү (skill test) сыяктуу этаптар бар. Бул процесстер талапкерлердин жумушчу катары квалификациясын жана даярдыгын текшерүүгө багытталган.
Министр Сабиров иш-чаранын жүрүшү менен таанышып, талапкерлерди тандоо процессине жана бул процесстин уюштурулушуна байкоо салды. Ал Кыргызстандын жарандарын чет өлкөлөрдө ишке орноштуруу процедурасынын ачыктыгынын, коопсуздугунун жана натыйжалуулугунун маанилүүлүгүн баса белгиледи. Ошондой эле бул кызматташуу жарандарга жумуш орундарын гана камсыз кылбастан, эмгек миграциясы процессинде алардын укуктарын коргоого да жардам берерин белгиледи.
"Бүгүн биз КР жарандарын чет өлкөдө жумушка орношуу үчүн сапаттуу жана коопсуз шарттар менен камсыз кылуу канчалык маанилүү экенин көрүп турабыз. Биз эмгек миграциясынын шарттарын жакшыртуу, жарандарыбыздын укуктарын коргоо деңгээлин жогорулатуу боюнча иштерди улантуудабыз. Бул жолдо бардык талапкерлерге ийгилик каалап, бул тандоо жумушка орношуу үчүн гана мүмкүнчүлүк эмес, ошондой эле карьералык өсүү жана жашоо шарттарын жакшыртуу мүмкүнчүлүгү экенин баса белгилегим келет", - деди министр.
Тандоонун жыйынтыгы боюнча акыркы этаптан ийгиликтүү өткөн жарандар Улуу Британиянын айыл чарба секторунда 6 айга чейинки мөөнөткө расмий жумушка орношууга мүмкүнчүлүк алышат.
