Бишкек, 22.02.25. /Кабар/. Жогорку Кеңештин депутаты Камила Талиева Баткен облусунун бир катар аймактарын кыдырууда.
Парламенттен билдиришкендей, Раззаков шаарында “Жергиликтүү өз алдынча башкаруу органдары жана коомдук консультативдик кеңештери социалдык биримдик үчүн” аттуу коомдук диалог аянтчасы болуп өттү. Бул иш-чара Лейлек районунун жарандык коомунун (жаштар, карылар, аялдар) жергиликтүү өз алдынча башкаруу органдары менен болгон кызматташуусун, диалогун күчөтүү максатында уюштурулган.
Белгиленгендей, иш-чарада мамлекеттик органдардын өкүлдөрү жана жарандык коом көптөгөн социалдык, экономикалык, айыл-чарба, билим берүү, саламаттык сактоо көйгөйлөрүн талкуулашты.
Мындан тышкары, депутат Раззаков шаарындагы Самат айылынын Самат орто мектебине барып, мугалимдер менен жолугушуп, жыйынтыгында Жогорку Кеңештин төрагасынын фондунан 3 компьютер тапшырды. Ошондой эле, Тайлан айылындагы Тайлан орто мектебине да төраганын фондунан интерактивдүү доска белекке берди .
"Депутаттын иш-сапары андан ары Сүлүктү шаарында уланып, мугалимдер жана студенттер менен жолугушту. Жолугушууда билим берүү тармагында ар кандай маселелер талкууланды",-деп айтылат маалыматта.
