Бишкек, 22.07.25. /Кабар/. Министрлер кабинетинин төрагасынын биринчи орун басары Данияр Амангелдиев Мамлекеттик бажы кызматынын жамаатына ведомствонун төрагасы Алмаз Салиевди тааныштырды.
Дайындоо президент Садыр Жапаровдун Мамлекеттик бажы кызматын Финансы министрлигинин түзүмүнөн чыгарып, министрлер кабинетинин курамына өз алдынча мамлекеттик орган катары киргизүү жөнүндөгү жарлыгына ылайык ишке ашырылды.
Жаңы төраганы Бажы кызматынын жамаатына тааныштыруу учурунда Данияр Амангелдиев түзүмдү кайра уюштуруу административдик процесстерди жөнөкөйлөтүү жана ведомствонун ишинин натыйжалуулугун жогорулатуу максатында жүргүзүлгөнүн баса белгиледи.
Анын айтымында, жаңы мүмкүнчүлүктөр менен бирге кызматтын алдында турган стратегиялык максаттарга жетүү үчүн жоопкерчилик дагы жогорулайт.
Өз кезегинде Алмаз Салиев өлкө жетекчилигине көрсөткөн жогорку ишеними үчүн ыраазычылык билдирип, Бажы кызматынын кызматкерлери коюлган милдеттерге жетүү үчүн бардык күч-аракеттерин жумшай турганына ишендирди.
