Бишкек, 15.07.26. /Кабар/. Чолпон-Ата шаарында коомдук саламаттык сактоо жаатындагы өзгөчө кырдаалдарга жооп кайтаруу боюнча эки күндүк ведомстволор аралык симуляциялык машыгуулар өттү.
Иш-чара Саламаттык сактоо министрлиги тарабынан Дүйнөлүк саламаттык сактоо уюмунун техникалык колдоосу менен VI Дүйнөлүк көчмөндөр оюндарына даярдык көрүүнүн алкагында уюштурулду.
Ведомствонун маалыматына караганда, катышуучулар Кырчын жайлоосунда жана Ысык-Көл райондук ооруканасында курч ичеги-карын инфекциясынын очогу жана белгисиз оору жайылган учурдагы аракеттердин алгоритмин моделдештиришти.
"Коркунучту эрте аныктоо, мекемелер аралык байланыш, эпидемияга каршы иш-чаралар жана кризистик коммуникация багыттары иш жүзүндө текшерилди", - деп айтылат маалыматта.
Өлкөнүн башкы мамлекеттик санитардык дарыгери Гүлбара Ишенапысова тутумдун даярдыгы кагаз жүзүндө эмес, реалдуу шартта ийгиликтүү сыналганын белгиледи.
ДССУнун өкүлү Жанара Бекенова бул биргелешкен машыгууларды Көчмөндөр оюндары сыяктуу ири эл аралык иш-чараларды коопсуз өткөрүүгө багытталган маанилүү инвестиция катары баалады.
