Бишкек 15.05.2025 /Кабар/. Быйыл Нарын облусунун Жумгал районунда курулуп жаткан Түгөл-Суу күнүмдүк жөнгө салуучу бассейни (БСР) пайдаланууга берилет. Бул тууралуу президенттин аймактагы өкүлчүлүгүнөн билдиришти.
Бүгүн министрлер кабинетинин төрагасынын орун басары — айыл чарба министри Бакыт Төрөбаев аталган суу сактагычтын курулуш иштери менен таанышты.
Буга чейин аймакта айдоо аянты көп болгондуктан суу тартыш болуп, вегетация маалында керектүү өлчөмдө суу менен камсыздоодо көйгөй жаралып келген. Бул көйгөйдү чечүү үчүн күз айларынан баштап жаз айларына чейинки жана суу кирген учурлардагы сууну кетирбей топтоп калуу максатында министрлик тарабынан БСР куруу мерчемделген.
Курулуш иштери 2023-жылы башталган БСРди пайдаланууга берүү үстүбүздөгү жылдын декабрь айына пландалууда.
Эгер БСР ишке кирсе 3 208 га сугат аянтына суу берүү жакшырат, 1602 га жаңы сугат жери өздөштүрүлөт. Натыйжада түшүмдүүлүк 2 эсе жогорулайт.
Мындан сырткары, Төрөбаев Нарын облусуна болгон иш сапарынын алкагында Орто-Токой суу сактагычына барып, топтолгон суунун көлөмүн көрдү.
"Тиешелүү жетекчилерге вегетация мезгилинде жергиликтүү калкты сугат суу менен үзгүлтүксүз камсыз кылууну тапшырды",-деп айтылат маалыматта.
