Бишкек, 04.07.25. /Кабар/. Бишкек шаарындагы №62 мектептин аймагында жаңы спорт аянтчасынын курулушу уланып жатат. Курулуш иштери 2024-жылдын 28-августунда башталып, шаардык бюджеттин эсебинен жүргүзүлүүдө.
Бишкек мэриясынын Капиталдык курулуш башкармалыгынан билдиришкендей, стадиондун аймагына 3500 чарчы метр газон төшөлүп, автоматташтырылган суугаруу системасы орнотулат. Сугат суусу Ала-Арча дарыясынан алынган техникалык суу менен толтурулган резервуардан келет — таза ичүүчү суу колдонулбайт.
Долбоордо ошондой эле төмөнкү объекттер каралган:
— жумшак резиналуу каптамадагы чуркоо жолдору,
— воркаут аймагы,
— балдар аянтчасы,
— футбол, баскетбол жана волейбол аянтчалары.
Ошондой эле мектеп иш-чараларына арналган имараттар курулуп, түнкү жарыктандыруу тутуму орнотулууда.
Учурда курулуш иштери уланып жатат. Үч негизги спорттук аянтча — футбол, баскетбол жана волейбол аянтчалары — акыркы баскычка келип калган: Негизги элементтер орнотулган, бирок айрым монтаж жана жасалгалоо иштери уланууда.
Мэриянын маалыматына караганда, объект учурда 75%га даяр. Стадионду 31-августта пайдаланууга берүү пландалган.
Асыл Нурбек кызы
