Бишкек, 25.02.25. /Кабар/. Бишкек шаарындагы №54 мектептин кошумча окуу имаратынын курулушу аяктады. Бул тууралуу Курулуш, архитектура жана турак жай-коммуналдык чарба министрлигинен билдиришти.
Маалыматка ылайык, имараттын курулушу 2019-жылы республикалык бюджеттин эсебинен башталып, тендердик наркы 68 млн сомду түзгөн.
Жаңы эки кабаттуу окуу корпусунда заманбап окуу жана лабораториялык класстар, мугалимдер бөлмөсү, ашкана, дарыгердин кабинети, ошондой эле кыздар жана балдар үчүн эмгек кабинеттери каралган. Жаңы корпустун жалпы аянты 1610 чарчы метрди түзөт.
Бул долбоор окуучулар үчүн ыңгайлуу жана заманбап шарттарды түзүү менен билим берүү сапатын жакшыртууга өбөлгө болот. Бишкек шаарындагы билим берүү инфраструктурасын өнүктүрүүдө маанилүү кадам болуп эсептелет.
