Бишкек, 26.02.26. /Кабар/. Бишкекте Кыргызстан, Беларусь, Индия, Иран, Казакстан, Кытай, Пакистан, Россия, Тажикстан жана Өзбекстандын коргоо ведомстволорунун эл аралык аскердик кызматташтык түзүмдүк бөлүмдөрүнүн жетекчилеринин, ошондой эле ШКУ Катчылыгынын өкүлдөрүнүн биринчи жыйыны өтүп жатат. Бул тууралуу Коргоо министрлигинен билдиришти.
Жыйын Коргоо министрлигинин Эл аралык аскердик кызматташтык башкармалыгынын башчысы Рустам Ормокоевдин төрагалыгы астында өтүүдө.
Кеңешменин жүрүшүндө эл аралык аскердик кызматташтык үчүн жооптуу түзүмдөрдүн жетекчилери ШКУга мүчө мамлекеттердин Коргоо министрликтеринин 2026-жылга карата кызматташтык планынын иш-чараларын ишке ашыруу маселелерин карап жатышат.
Иш-чаранын негизги максаты — ШКУга мүчө мамлекеттердин коргоо министрлеринин алдыдагы кеңешмесин уюштуруу жана өткөрүү болуп саналат.
Жыйындын жыйынтыгында ШКУга мүчө мамлекеттердин өкүлдөрү тарабынан тиешелүү протоколго кол коюлат.
