Бишкек, 30.10.25. /Кабар/. Министрлер Кабинетинин Төрагасы Адылбек Касымалиев «E-commerce EXPO Central Asia 2025» электрондук коммерция боюнча эл аралык форумунун ишине катышты.
Министрлер кабинетинин башчысы электрондук коммерциянын маанилүүлүгүн белгиледи, ал экономикалык өнүгүүгө, анын ичинде инвестициялык ишмердүүлүккө күчтүү түрткү берет, экономикада олуттуу структуралык өзгөрүүлөрдүн себеби болуп саналат.
«Кыргыз Республикасы үчүн электрондук соода жөн гана жаңы сектор эмес, экономикалык өсүштүн жана аймактык жана глобалдык жеткирүү чынжырларына интеграциялоонун күчтүү куралы болуп калды. Акыркы жылдары биз онлайн-сатуулардын, санариптик төлөмдөрдүн тез өсүшүн, ошондой эле чакан жана орто бизнес үчүн электрондук экономикага катышууну жеткиликтүү кылган логистикалык жана финансылык инфраструктуранын өнүгүшүн байкап жатабыз», - деди ал.
Адылбек Касымалиев 2025-жылы электрондук коммерциянын ички рыногунун көлөмү болжол менен 525 млн долларды түзөрүн, өсүш өткөн жылга салыштырмалуу 15%га жакын болгонун билдирди. 2025-жылдын биринчи жарым жылдыгында онлайн сатып алуулар 1 млнго жакын транзакцияны түзүп, суммасы 1,7 млрд сомго жакын болду, көлөмү боюнча өсүш өткөн жылдын ушул эле мезгилине салыштырмалуу дээрлик 56%ды түздү.
Министрлер кабинетинин башчысы электрондук коммерция паркы иштелип жатканын белгиледи. Бул электрондук коммерция ишкерлерин колдоо, санариптик инфраструктураны жана логистиканы түзүү аянтчасы. Жеңилдетилген салык жана укуктук база киргизилди: мисалы, жүгүртүүдөн 2% атайын салык режими, электрондук коммерциянын катышуучулары үчүн КНСтен, киреше салыгынан жана сатуудан салыктан бошотуу. Трансчек аралык сооданы өнүктүрүүгө өзгөчө көңүл бурулууда.
