Бишкек, 10.07.25. /Кабар/. Баткенде жарандар мыйзамсыз курал-жарактарды ыктыярдуу түрдө тапшырууда. Бул тууралуу Баткен облустук ички иштер министрлигинен билдиришти.
Маалыматка ылайык, 9-июндан 9-июлга чейин Баткен районунун аймагында "Арсенал" алдын алуу операциясы жүргүзүлдү.
Милиция кызматкерлери тарабынан жүргүзүлгөн түшүндүрүү иштери жарандар арасында укуктук аң-сезимдин жогорулашына түрткү берип, жарандар өз ыктыяры менен 78 даана ок атуучу курал, ондогон ок-дарылар жана 2 даана кол гранатасын тапшырышты.
Бул көрсөткүч — жарандардын коомдук коопсуздукка болгон жоопкерчилигин айгинелеп, мыйзамсыз курал-жарактын айланасындагы тобокелдиктерди азайтуу багытында маанилүү кадам болуп эсептелет.
Баткен ОИИБ жарандардын мындай жогорку жарандык позициясын белгилеп, ыктыярдуу түрдө тапшырылган ар бир курал мүмкүн болгон кылмыштын алдын алганын баса белгилейт.
