Бишкек, 29.03.26. /Кабар/. Баткен шаарын жана Баткен районунун айыл аймактарын аралап өткөн Р6 каналы оңдолууда. Бул тууралуу облустагы өкүлчүлүктөн билдиришти.
Маалыматка ылайык, оңдоо иштери мамлекеттик каржылоо менен 2025-жылдын декабрь айында башталган. 463 млн сомго каналдын 15,5 чакырым аралыгында калыбына келтирүү иштери жүрүүдө.
Облус башчысы Мамыржан Рахимов курулуш иштерин тездетүүнү тапшырды. Тагыраагы, 15-апрелге чейин дыйкандарга сугат суу берилиши керектиги белгиленди.
Учурда 160тан ашык жумушчу жана тийиштүү адистер иш алып барууда. Керектүү техникалар тартылган. Азыркы күндө 9,8 километр аралыгында каналдын негизин даярдоо аяктап калды, калган бөлүгүндө бетондоо иштери жүрүп жатат.
