Бишкек, 17.04.25. /Кабар/. Баткен облусунда бюджеттен бөлүнгөн 500 млн сомдун эсебинен бир катар долбоорлор ишке ашырылууда. Бул тууралуу президенттин аймактагы өкүлчүлүгүнөн билдиришти.
Бүгүн президенттин өкүлүнүн орун басары Абдирашит Ташбалтаев облус башчысы Айбек Шаменовдун тапшырмасына ылайык, Лейлекте курулган обьекттерден кабар алды. Жогору айтылган каражаттын эсебинен төмөндөгүдөй долбоорлор ишке ашырылууда:
Соода комплекси
Катраң айылындагы соода борборунун курулушу аяктоо алдында турат. Курулушка 7 млн сом бөлүнгөн. Үч кабаттуу заманбап соода комплексин 31-август эгемендүүлүк күнүнө карата бүткөрүү аракеттери көрүлүүдө. Бул соода жайында 16 жумуш орду түзүлөт.
Айбике айылындагы сугат суу долбоору
Айбийке айылында 5,5 чакырым аралыкка сугат суу түтүгүн тартуу иштерине 30 млн сом бөлүнгөн. Ал эми 1,5 млн сом айыл өкмөтүнүн эсебинен каржыланып, айылга суу жеткирилди.
Раззаков шаарындагы мал базар
Облусту өнүктүрүүгө бөлүнгөн 500 млн сомдун эсебинен аталган мал базарды курууга 15 млн сом ажыратылган. Лейлек районунун өнүктүрүү фондунан 6 млн 700 миң сом, жергиликтүү бюджеттин эсебинен 3 млн 654 миң сом жумшалып, заманбап шарттар түзүлгөн. Учурда базар үзгүлтүксүз иштеп жатат. Ачылган күндөн бугүнкү күнгө чейин муниципалдык базар 2 млн сом таза киреше тапкан.
Темир бетон, шагыл жана курулуш материалдар заводу
Ак-Суу айыл аймагынын Жеңиш айылында жайгашкан муниципалдык ишкана үчүн Баткен облусун өнүктүрүүгө багытталган 500 млн сомдун эсебинен 5 млн сом, жергиликтүү бюджеттен 2 млн 500 миң сом каржыланган. 5 жумуш оруну түзүлүп, учурда ишкана үзгүлтүксүз иштеп жатат. 2024-жылы жергиликтүү бюджетке 200 миң сом киреше алып келген.
Ак-Суу-Саркент каналы
Ак-Суу айыл аймагында ишке ашырылуучу Ак-Суу - Саркент дарыясынын жээгине таш дамба куруу үчүн республикалык бюджеттен 48 млн 560 миң сом каржыланып, жалпы 2 360 метр аралыкта жумуш аткарылган. Ирригациялык долбоорду улантуу үчүн 2025-жылы дагы 78 млн 639 миң каржыланып, иш уланууда. Курулушту 2025-жылдын 30-сентябрында аяктоо пландалган.
Айна-Таш - Таңги-Башы сугат суу долбоору
Сумбула айылындагы сугат суу долбоору үчүн Баткен облусун өнүктүрүүгө багытталган 500млн сомдун эсебинен 10млн 193миң сом каржыланган. Жергиликтүү бюджеттен 810миң сом акча каражаты бөлүнүп, тоодогу булак суусу 5,5км аралыкка сугат суу түтүктөрү аркылуу артылып келинген. Натыйжада 3 айыл суу менен камсыз болгон.
"Жашыл бак" интенсивдүү кооперативи
Кулунду айыл аймагынын Майты участкасына 100 гектар аянт өздөштүрүлдү. Ал үчүн облусту өнүктүрүүгө багытталган 500 млн сомдун эсебинен 25,8 млн сом каржыланган.
Муниципалдык бакка тамчылатып сугаруу системасы орнотулуп, суу топтоо үчүн 1000 м3 жана 4000 м3 бассейн курулган. Бак көчөттөрү алгачкы түшүмүн бере баштады.
Өкүлдүн орун басары Абдирашит Ташбалтаев жергиликтүү жетекчилерге республикалык бюджеттин эсебинен курулган ишканалардын натыйжалуу иштөөсүн камсыз кылууну тапшырды.
