Бишкек, 25.05.26. /Кабар/. Вьетнамдын Да Нанг шаарында өтүп жаткан спорттук күрөш боюнча Азия чемпионатында (U-23) Нурболот Бердикулов грек-рим күрөшү боюнча күмүш медалга ээ болду.
Дене тарбия жана спорт мамлекеттик агенттигинен билдиришкендей, ал 55 килограммга чейинки салмак категориясында күч сынашып, алгачкы беттеште өзбекстандык Хожиакбар Кучкаровго 1:11 эсебинде утулуп калган. Андан кийин иорданиялык каршылашы Ахмад Махмудду 3:1 эсебинде утуп, жарым финалга жолдомо алган.
Жарым финалдык беттеште индиялык Нираж Пателди 3:1 эсебинде ишенимдүү жеңип, финалдык беттеште кайрадан өзбекстандык каршылашы Хожиакбар Кучкаровго 1:7 эсебинде утулуп, күмүш медалга ээ болду.
Эскерте кетсек, Кыргызстандын грек-рим күрөшү боюнча U-23 курама командасы Азия чемпионатында командалык эсепте 3-орунду ээледи.
