Бишкек, 05.11.25. /Кабар/. Аманбек Дүйшенов Соода-өнөр жай палатасынын Малайзиядагы өкүлү болуп дайындалды.
Палатадан билдиришкендей, сертификатты палатанын президенти Темир Сариев тапшырды.
Аманбек Дүйшенов Малайзиянын Эл аралык ислам университетин ислам банк иши жана каржы адистиги боюнча, ал эми Социалдык өнүктүрүү жана ишкердик институтун каржы жана кредит адистиги боюнча аяктаган.
Ал Абу-Даби, Россия жана Индияда мунай жана газ тармагындагы долбоорлордо иштеген, экологиялык коопсуздук, логистика, процесстерди санариптештирүү жана келишимдерди башкарууга басым жасаган. Ошондой эле Аманбек Дүйшенов ЮНИСЕФтин колдоосу менен Кыргызстанга телемедицинаны киргизүү боюнча долбоорду жетектеген.
Аманбек Дүйшеновдун дайындалышы Кыргызстан менен Малайзиянын бизнес коомчулугунун ортосундагы кызматташтыкты кеңейтүүгө, инвестицияларды тартууга, экспортту колдоого жана эл аралык рыноктордо кыргызстандык ишкерлердин кызыкчылыктарын алга жылдырууга багытталган.
