Бишкек, 11.02.25. /Кабар/. Аламүдүн дарыясынын нугун механикалык тазалоонун экинчи этабы уланууда.
Мэриядан билдиришкендей, дарыяны тазалоо үчүн жаңы атайын техникалар, анын ичинде 7 экскаватор жана 10 "HOWO" үлгүсүндөгү жүк ташуучу унаа тартылды.
Тазалоо иштери "Бишкек жашыл чарба" муниципалдык ишканасы, Кыргыз Республикасынын Өзгөчө кырдаалдар министрлиги жана башка шаардык кызматтар менен биргеликте аткарылууда.
Белгилей кетсек, экинчи этапта дарыянын 500 метри тазаланып, 3 852 тоннадан ашык таштанды чыгарылды.
Эске салсак, буга чейин Аламүдүн дарыясынын нугун тазалоонун биринчи этабында 1600метри тазаланып, 12 тоннадан ашык таштанды чыгарылган.
Ошондой эле тиешелүү уруксат документтери жок, дарыянын жээгинде жайгашкан 15 объект бузулууга дуушар болду. Алардын ичинен 10 объект демонтаждалып, 5 объекттин ээлери кепилдик милдеттенмелерин жазышты.
"Механикалык тазалоо-суу ташкынын алдын алуу, суунун сапатын жакшыртуу жана ыңгайлуу шаар чөйрөсүн түзүү үчүн маанилүү кадам болуп саналат",-деп айтылат маалыматта.
