Бишкек, 16.10.26. /Кабар/. К.Скрябин атындагы Кыргыз улуттук агрардык университетинде "Бүгүнкү инновациялар – эртеңки азык-түлүк коопсуздугу" аттуу AgriFood Innovation Day иш-чарасы өттү.
Окуу жайдан билдиришкендей, иш-чараны БУУнун Азык-түлүк жана айыл чарба уюму, БУУнун Дүйнөлүк азык-түлүк программасы жана университет биргеликте уюштурду.
Анда студенттер жана жаш изилдөөчүлөр сууну үнөмдөө, жайыттарды башкаруу, айыл чарбасын санариптештирүү, климаттын өзгөрүшүнө ыңгайлашуу жана азык-түлүк ысыраптарын азайтуу боюнча долбоорлорун сунушташты.
Программанын алкагында илимий жетишкендиктердин көргөзмөсү жана студенттик долбоорлордун сынагы өттү. Алдын ала баалоонун жыйынтыгында беш команда финалга чыгып, өз долбоорлорун эксперттерге тааныштырды.
