Бишкек, 08.09.25. /Кабар/. Бүгүн министрлер кабинетинин төрагасы Адылбек Касымалиев борбор калаадагы азиз жана көрүүсү начар балдар үчүн атайын жалпы билим берүүчү мектеп-интернатка барып, окуучулардын билим алуу жана жашоо шарттары менен таанышты.
Иш сапардын алкагында мектептин окуу корпустары, жатаканасы, окуу устаканалары, спорттук аянтчасы, ашканасы, спорт жана жыйындар залы, ошондой эле медициналык пункту текшерилди. Мектеп жетекчилиги жана педагогикалык жамаат менен жолугушуу өтүп, учурдагы муктаждыктар жана сунуштар талкууланды.
Адылбек Касымалиев билим берүү мекемеси 1939-жылдан бери иштеп келе жатканын белгилеп, мектеп-интернатты толук жаңылоонун зарылдыгын баса көрсөттү. Ал бардык санитардык, архитектуралык жана инклюзивдик талаптарга жооп берген жаңы заманбап мектеп-интернатын куруу боюнча сунуштарды даярдоону тапшырды.
Ошондой эле, жакын арада окуу процесси үчүн керектүү атайын жабдуулар — Брайль системасына ылайык тилкелүү такталар, рельефтүү беттер, 3D-карталар, акылдуу көз айнектер жана таяктарды сатып алууну, окуучулардын ден соолук өзгөчөлүктөрүн эске алуу менен камсыздоого тапшырма берди.
