Бишкек, 03.02.26. /Кабар/. Министрлер кабинетинин төрагасы Адылбек Касымалиев Абу-Даби өнүктүрүү фондунун башкы директору Мохаммед Сейф Аль-Сувейди менен сүйлөшүүлөрдү өткөрдү.
Минкаб төрагасы белгилегендей, Кыргыз Республикасы Бириккен Араб Эмираттары менен ар тараптуу жана узак мөөнөттүү кызматташууну, анын ичинде Абу-Даби өнүктүрүү фонду менен кызматташууну бекемдөөгө өзгөчө маани берет.
Жолугушуунун жүрүшүндө инфраструктураны өнүктүрүү, ошондой эле экспорт жана инвестиция тармагында биргелешкен долбоорлорду ишке ашыруу мүмкүнчүлүктөрү талкууланды.
Тараптар биргелешип түзүлгөн “Абу-Даби Кыргыз Инвестмент” ачык акционердик коомунун ишмердүүлүгү боюнча тыгыз кызматташууну улантууну макулдашты.
“Абу-Даби Кыргыз Инвестмент” ААК алкагында инвестициялык долбоорлорду ийгиликтүү ишке ашыруу Кыргыз Республикасы менен Бириккен Араб Эмираттарынын ортосундагы кызматташтыктын жаңы барагын ачат деп ишенем” - деген Адылбек Касымалиев, эмират тарапты үстүбүздөгү жылдын апрель айында Бишкекте өтө турган “Борбор Азия – Булуңдагы араб өлкөлөрүнүн кызматташтык кеңеши” инвестициялык форумуна катышууга чакырды.
Өз кезегинде Абу-Даби өнүктүрүү фондунун башкы директору Мохаммед Сейф Аль-Сувейди Кыргыз Республикасындагы долбоорлорго өзгөчө көңүл бурарын айтып, потенциалдуу долбоорлорду Абу-Даби өнүктүрүү фондуна жөнөтүүнү сунуштады.
