Бишкек, 25.11.25. /Кабар/. Кадамжайда Нургазиев каналын реконструкциялоо иштери башталды. Бул тууралуу президенттин Баткен облусундагы өкүлчүлүгүнөн билдиришти.
Саамалыкка президенттин Баткен облусундагы өкүлү Айбек Шаменов баштаган жергиликтүү жетекчилер жана айыл тургундары катышты.
Реконструкциянын жүрүшүндө Кадамжай районунун Исхак Полотхан айыл аймагы менен Алга айылын аралап өткөн канал 10 куб аянтка кеңейтилет. Жалпы узундугу 35 чакырым болгон каналдын курулушу Дүйнөлүк банк тарабынан каржыланып жатат. Долбоордун суммасы 425 млн 569 миң сомду түзөт.
Курулуш иштери аяктаса 5 миң гектар жерге суу берүү жакшырып, 500 гектар жер жаңыдан өздөштүрүлөт.
Реконструкциялоо иштерин 2029-жылы бүткөрүү пландалууда. Курулуш иштерин кытайлык менен ата мекендик компания аткарат.
Белгилей кетсек, канал 1978-жылы пайдаланууга берилип, учурда эскилиги жетип, суу жоготууга учурап, натыйжада суу тартыштыгы пайда болгон.
