Бишкек, 12.12.25. /Кабар/. Ош облусунда Араван – Ак-Буура каналы жаңыланууда. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Бүгүнкү күндө каналдын ирригациялык системасынын суу жеткирүү инфраструктурасы жаңыланып, анын ичинде суу алуучу курулмалар, магистралдык каналдар жана бөлүштүрүүчү тармактар реконструкцияланууда.
Араван – Ак-Буура каналынын жалпы узундугу — 31,3 чакырымды түзүп, 21 918 гектар жерди сугат суу менен камсыздайт. Анын ичинен 6 220 гектар — жаңы өздөштүрүлүп жаткан сугат жерлер.
