Бишкек, 27.02.26. /Кабар/. Бүгүн Жогорку Кеңештин төрагасы Марлен Маматалиев парламентте уюштурулган "Жаштар диалогу – 2026" иш-чарасына катышты. Бул тууралуу парламенттен билдиришти.
Төрага өз сөзүндө өлкө калкынын 2,5 миллионун жаштар түзөрүн белгилеп, келечек ээлерине шарт түзүү мамлекеттин артыкчылыктуу багыты экенин баса белгиледи.
Марлен Маматалиев жаштар менен байланышты чыңдоо максатында Жогорку Кеңештин төрагасынын алдында Жаштар кеңеши түзүлгөнүн жарыялады.
"Бул кеңеш жаштардын укуктарын коргоо, алардын коомдук-саясий жана экономикалык өнүгүүсүнө шарт түзүү боюнча сунуштарды иштеп чыгуу максатында жигердүү иш алып барат", — деди ал.
Төрага акыркы жылдары өлкө экономикасындагы оң өзгөрүүлөрдү жана президент Садыр Жапаровдун жаштар саясатына берип жаткан өзгөчө маанисин атап өттү. Ал жаштардын жаңы демилгелерин ишке ашырууга парламент ар тараптан көмөк көрсөтүүгө даяр экенин билдирди.
Иш-чарага ар кыл тармактын жаш адистери, студенттер, Жогорку Кеңештин депутаттары жана мамлекеттик катчы Арслан Койчиев катышты.
