Бишкек, 19.09.25 /Кабар/. Жогорку Кеңеште Кара-Кыргыз автономиялуу облусунун 100 жылдыгына жана анын туңгуч жетекчиси, көрүнүктүү мамлекеттик жана коомдук ишмер Иманалы Айдарбековго арналып жазылган "Биринчи" китебинин жана даректүү тасманын бет ачары өттү.
Парламенттен билдиришкендей, иш-чарага төраганын орун басары Нурбек Сыдыгалиев баштаган Жогорку Кеңештин депутаттары, коомдук жана мамлекеттик ишмерлер, ошондой эле Иманалы Айдарбековдун туугандары катышты.
Нурбек Сыдыгалиев өз сөзүндө Иманалы Айдарбеков кыргыз мамлекеттүүлүгүнүн калыптанышында чоң роль ойногонун белгилеп: "Улуу инсан Кара-Кыргыз автономиялуу облусун түзүүгө активдүү катышып, анын биринчи жетекчиси катары келечектеги мамлекетибиздин негизин түптөгөн", - деди.
Нурбек Сыдыгалиев ошондой эле китептин жана даректүү тасманын жаратуучуларына өзгөчө ыраазычылыгын билдирди.
Коомдук ишмерлер Медеткан Шеримкулов, Миталип Мамытов, президентке караштуу Мамлекеттик тил жана тил саясаты боюнча улуттук комиссиянын төрагасы Мелис Мураталиев, президенттин кеңешчиси Арслан Койчиев, тарых илимдеринин доктору Зайнидин Курманов, депутат Кундузбек Сулайманов жана башкалар дагы өз сөздөрүндө Иманалы Айдарбековдун кыргыз мамлекетинин жаралышына жана өнүгүшүнө кошкон салымын белгилешип, залкар инсандын өмүр жолундагы негизги учурларга токтолушту.
Анын ичинде Медеткан Шеримкулов Иманалы Айдарбеков, Абдыкерим Сыдыков, Жусуп Абдрахманов, Абдыкадыр Орозбеков, Ишеналы Арабаев өндүү аталардын ысымдарын даңазалап, унуткарбоо үчүн мындай иш-чараларды байма-бай өткөрүп туруунун зарылдыгын кошумчалады.
Мамлекетти түптөөчү аталар өз элине берилүү менен кызмат кылганын эскерген депутат Чыңгыз Айдарбеков алардын өмүр жолу мекенчилдиктин жана өз милдетине берилгендиктин чыныгы үлгүсү экенин белгилеп, китептин жана даректүү тасманын авторлоруна ыраазычылык айтты.
Иш-чаранын соңунда даректүү тасма көрсөтүлдү.
Белгилей кетсек, "Биринчи" китебинин авторлорунун бири президенттин кеңешчиси Арслан Койчиев жана тарых илимдеринин доктору Зайнидин Курманов. Ал эми даректүү тасма "Медиа-Хаб" долбоорунун тобу тарабынан тартылган.
