Бишкек, 27.05.25. /Кабар/. Бүгүн, 27-майда Бишкек шаарына Жамааттык коопсуздук жөнүндө келишим уюмуна (ЖККУ) мүчө мамлекеттердин коргоо министрлеринин кеңешинин кезектеги жыйынына катышуу үчүн делегациялардын өкүлдөрү келишти.
Коргоо министрлигинен билдиришкендей, аталган отурум эртең, 28-майда Кыргызстандын коргоо министри Руслан Мукамбетовдун төрагалыгы алдында өтөт.
Анын жүрүшүндө катышуучулар ЖККУнун жамааттык коопсуздук региондорундагы аскердик коопсуздуктун чакырыктарын жана коркунучтарын ошондой эле аскердик жааттагы өнүгүү маселелерин талкуулашат.
Андан тышкары отурумдун жүрүшүндө ЖККУнун коргоо ведомстволорунун жетекчилеринин ортосунда эки тараптуу жолугушууларды өткөрүү пландаштырылууда.
