Бишкек, 23.09.26. /Кабар/. Суу ресурстары, айыл чарба жана кайра иштетүү өнөр жайы министринин орун басары Рысгүл Акимжанова Базар-Коргон, Сузак райондорунда жана Манас шаарында иш алып барган айыл чарба жана кайра иштетүү ишканаларынын ишмердүүлүгү менен таанышты.
Ведомстводон билдиришкендей, Базар-Коргондогу "Арзыбай-Ата Компани" ЖЧКсынын соода-логистикалык борбору жылына 400 тоннага чейин мөмө-жемиш жана жашылча сактоого мүмкүнчүлүк берет. Учурда борбордо малина, болгар калемпири, гилас жана сабиз сакталууда. Ишкана айыл чарба продукцияларын экспортко да чыгарат.
Сузак районундагы ишкана Россиядан алып келинген сырьёдон күн карама майын өндүрүп, продукциясын Жалал-Абад, Ош жана Баткен облустарына жеткирет. Мындан тышкары, ишканада кир самын да өндүрүлөт.
Манас шаарындагы соода-логистикалык борбордо учурда малина жана гилас сакталууда. Ишкана жетекчиси борбордун кубаттуулугун кеңейтүү пландары менен бөлүшүп, өндүрүштү өнүктүрүү үчүн жеңилдетилген насыя алуу маселесинде колдоо көрсөтүүнү өтүндү.
Рысгүл Акимжанова ишкерлердин сунуш-пикирлерин угуп, көтөрүлгөн маселелер тиешелүү мыйзамдардын жана мамлекеттик колдоо механизмдеринин алкагында караларын белгиледи.
