Бишкек, 17.07.26. /Кабар/. 6-июлда Жалал-Абад облустук төрөт үйүндө 3 эм төрөлгөн. Бул тууралуу президенттин аймактагы өкүлчүлүгүнөн билдиришти.
Маалыматка ылайык, Сузак районунун тургуну Жаркынай Алмаматова эки кыз жана бир уулду жарык дүйнөгө алып келген.
Бүгүн облус башчысы Тилек Текебаев үч эм төрөлгөн энеден жана ымыркайлардан кабар алды.
"Учурда эненин жана ымыркайлардын абалы дарыгерлердин көзөмөлүндө болуп, канааттандырарлык деп бааланууда", - деп айтылат маалыматта.
Облус башчысы үй-бүлөнү куттуктап, ымыркайлардын ден соолугу чың, өмүрү узун болуп, эл-журтка кызмат кылган татыктуу инсандардан болуп чоңоюшуна тилектештигин билдирди.
Ошондой эле белектерин тапшырып, үч эмдин төрөлүшү үй-бүлө үчүн эле эмес, жалпы облус үчүн да кубанычтуу окуя экенин белгиледи.
