Бишкек, 16.05.25. /Кабар/. Жакында Баткен районунда айыл чарба багытында 2 ишкана ачылат. Бул тууралуу президенттин аймактагы өкүлчүлүгүнөн билдиришти.
Алардын бири Ак-Татыр айылындагы мөмө-жемишти кайра иштетүүчү жана кургатуучу муниципалдык ишкана. Учурда курулуш иштери аяктап, керектүү жабдуулар орнотулуп, алгачкы продукциясын тесттик режимде чыгарды.
Ишкананын курулушуна Баткен облусун өнүктүрүүгө бөлүнгөн 500 млн сомдун эсебинен 22 млн сом каржыланган.
Бул борбор иштей баштаса жергиликтүү тургундар жумуш менен камсыз болот, айыл аймактын киреше булагы артып, жергиликтүү багбандар түшүмүн жеринде сатууга шарт түзүлөт.
Ушундай эле айыл чарба багытындагы дагы бир ишкана Жаңы-Жер айылында курулду. Айыл чарба продукциясын муздатып сактоочу логистикалык борбордун курулушуна, облусту өнүктүрүүгө багытталып, республикалык бюджеттен бөлүнгөн 500 млн сомдун эсебинен 7 млн сом, жергиликтүү бюджеттен 3 млн сом, өнөктөш болгонКореянын Good Neighbours уюмунан 17,1 млн сом каржыланган.
Ишкананын кубаттуулугу 500 тоннаны түзөт, бул жергиликтүү дыйкандардын түшүмүн сактоого жана кирешесин жогорулатууга жардам берет. 10 адам жумуш менен камсыз болот.
Учурда борбор тесттик режимде иштеп баштады.
