Бишкек, 20.06.26. /Кабар/. Чолпон-Атада Чыңгыз Айтматовдун демилгеси менен негизделген Ысык-Көл эл аралык форумунун 40 жылдыгына арналган иш-чаралар уланууда.
Маданият, маалымат жана жаштар саясаты министрлигинен билдиришкендей, кечээ, 19-июнда №2 мамлекеттик резиденцияда форумдун пленардык жыйындары өттү.
Форумдун биринчи бөлүгүнүн модератору мамлекеттик катчы Арслан Койчиев болду. Жыйында Россия, Түркия, Өзбекстан, Казакстан, Кытай, Румыния, ошондой эле ТҮРКСОЙ жана Түрк маданияты жана мурасы эл аралык фондунун өкүлдөрү сөз сүйлөштү.
Пленардык жыйындын кийинки бөлүгү маданият, маалымат жана жаштар саясаты министри Мирбек Мамбеталиев тарабынан модерацияланды. Анда Казакстан, Улуу Британия, Италия жана Кыргызстандын белгилүү окумуштуулары, саясат таануучулары жана жазуучулары баяндама жасашты.
Форумдун кийинки сессияларында Түрк академиясынын, Тажикстандын жазуучулар союзунун, Өзбекстандын президентине караштуу Стратегиялык жана аймактар аралык изилдөөлөр институтунун, ошондой эле Испания, Кытай жана Украинанын өкүлдөрү катышып, Чыңгыз Айтматовдун дүйнөлүк адабияттагы орду, маданияттар аралык диалог жана азыркы дүйнөдөгү гуманисттик баалуулуктар тууралуу пикир алышышты.
Сөз сүйлөгөндөрдүн ар бири Чыңгыз Айтматовдун дүйнөлүк гуманизмдин устаты катары гениалдуулугун жана форумдун тынчтыкты, өз ара түшүнүшүүнү жана жаратуучулук кызматташтыкты бекемдөөгө багытталган эл аралык диалог аянтчасы катары маанисин өзгөчө белгилешти.
Белгилей кетсек, Ысык-Көл эл аралык форуму 21-июнга чейин уланат.
