Бишкек, 01.06.26 /Кабар/. Японияда күчтүү тайфундун жакындап келүүсүнө байланыштуу 400дөн ашык авиакаттам токтотулду. Ал 1–2-июнь күндөрү Окинава префектурасына жетери күтүлүп жаткандыктан, каттамдардын көбү аталган префектурада токтотулган. Бул тууралуу ТАСС кабарлайт.
Тайфундун борбору учурда префектуранын түштүк тарабында жайгашып, түндүк багытты көздөй саатына болжол менен 15 чакырым ылдамдык менен жылып баратат. Адистердин айтымында, ал өткөн аймактарда шамалдын ылдамдыгы секундасына 30 метрге жетип, айрым учурларда шамалдын ыргагы 45 метрге чейин күчөшү мүмкүн.
Синоптиктердин болжолунда, тайфун Окинавадан өткөндөн кийин багытын түндүк-чыгышка өзгөртүп, Япониянын Тынч океан жээгин бойлой жылышы ыктымал. Натыйжада ал Кюсю жана Сикоку аралдарына, ошондой эле Токио баш болгон борбордук аймактарга таасирин тийгизиши мүмкүн.
Жергиликтүү бийлик тургундарды жана саякатчыларды аба ырайына байланыштуу эскертүүлөргө көңүл буруп, коопсуздук чараларын сактоого чакырууда.
