Бишкек, 28.01.25. /Кабар/. Бүгүн ички иштер министри Улан Ниязбеков Шанхай кызматташтык уюмунун Аймактык антитеррордук түзүмүнүн аткаруу комитетинин директору Уларбек Шаршеев менен жолукту. Бул тууралуу ведомстводон маалымдашты.
Ички иштер министри Улан Ниязбеков өз сөзүндө ШКУнун Антитеррордук түзүмү учурдагы дүйнөдө, өзгөчө Борбор Азияда терроризм жана экстремизмге каршы күрөшүүдө мамлекеттер ортосундагы кызматташтыкты чыңдап, бекемдөөдө маанилүү экениндигин баса белгиледи.
"Ар кандай коркунучтарга каршы турууда аймактын, анын ичинде өлкөбүздүн коопсуздугун камсыз кылууда сиздин көп жылдык тажрыйбаңыз жана жогорку кесипкөйлүгүңүз менен биргелешип, натыйжалуу ийгиликтерге жетишебиз", -деди министр.
Ошондой эле ар тараптуу кызматташууга даяр экенин айтып, жаңы кызмат орду менен куттуктап, ишине ийгиликтерди каалады.
