Бишкек, 28.02.25. /Кабар/. Таштанды контейнерлеринин жанына унааны токтоткон айдоочуларга айып салынат.
Мэриядан билдиришкендей, таштанды аянтчаларынын жанына унаасын токтоткон 5 айдоочуга айып салынды. айдоочулар Бишкек шаарын көрктөндүрүү эрежелеринин 66-пунктун бузгандыгы үчүн "Укук бузуулар жөнүндө" кодексинин 114-беренеси боюнча протоколдор түзүлүп, төрт айдоочуга 9 000 сом, 1 юридикалык жакка 13 000 сом айып пул салынды.
Белгилей кетсек, борбор калаада жашыл аймакта унааларды токтотууга жана жайгаштырууга тыюу салынган. Бул үчүн да 3 000 сомдон 13 000 сомго чейин айып пул каралган.
"Муниципалдык инспекция Бишкек шаарынын көрктөндүрүү эрежелерин сактоону чакырат. Бул эрежелерди менчигинин түрүнө карабастан, бардык жеке жана юридикалык жактар сакташы керек",-деп айтылат маалыматта.
