Бишкек, 04.06.25. /Кабар/. Ысык-Көл облусунда Тамга менен Караколдо электр берүү чубалгылары жана көмөк чордондору курулат. Кредиттик макулдашууну ратификациялоо боюнча мыйзам долбоору парлментте биринчи окууда каралып, кабыл алынды.
Бул документке 2025-жылдын 22-апрелинде Вашингтон шаарында Кыргызстан менен Ислам өнүктүрүү банкынын (ИӨБ) ортосунда кол коюлган.
Энергетика министринин орун басары Насипбек Керимовдун айтымында, Ысык-Көл облусунда Тамгада жана Караколдо электр берүү линиясын жана подстанцияларды куруу долбоорунда 220/110/10 кВ “Каракол” жана 220/110/24 кВ “Тамга” көмөк чордондорун, ошондой эле узундугу болжол менен 90 чакырым болгон 220 кВ “Тамга-Каракол” электр берүү чубалгыларын куруу каралган.
“Долбоордун жалпы наркы 60,25 млн АКШ долларын түзөт, анын ичинен 58,25 млн АКШ долларын ИӨБ жеңилдетилген насыя түрүндө каржылайт, ал эми 2 млн АКШ долларын Кыргыстан тең каржылайт”, - деди ал.
