Бишкек, 18.03.25. /Кабар/. Бүгүн, 18-мартта Таласта “Жаңы муун – жаркын келечек, Таза муун – коопсуз келечек” аталышындагы форум өтүп, ага эл өкүлдөрү, белгилүү спортчулар, алып баруучулар жана актерлор катышты.
ИИМден билдиришкендей, аталган форум министрлер кабинетинин “2022-2028- жылдарга карата укук бузуулардын алдын алуу чөйрөсүндөгү концепциясынын” жана 2023-жылдын 4-декабрында кабыл алынган иш-аракеттердин Улуттук планынын негизинде уюштурулган.
Форумга ички иштер министринин орун басары Октябрь Урмамбетов, Талас ОИИБдин башчысы Азенбек Козукеев жана Талас облусундагы 100дөн ашуун мектептен 500гө жакын окуучу катышты.
Иш-чаранын жүрүшүндө конокторго кыска метраждуу тасма көрсөтүлүп, бир катар интерактивдүү оюндар уюштурулуп, кылмыштуулуктун алдын алууга багытталган сахналаштырылган чыгармалар коюлду.
Жаштар форуму флешмоб менен жыйынтыкталып, катышуучулар өздөрүнүн коомдук көз караштарын жана укук бузууларды алдын алуу боюнча маанилүү билдирүүлөрүн коомго жеткиришти. Жыйынтыгында форумдун катышуучуларына жана конокторуна ыраазычылык билдирилип, сыйлыктар тапшырылды.
